नेपाली   |  English

ट्राफिकले कारवाही गरेपछि चालकले गोंगबुको सडकमै तेर्साए बस,बाटो खुलाउन प्रहरी परिचालन


A A A

बसका चालकले बढी पैसा लिएको गुनासो थियो

काठमाडौं – गोंगबुस्थित बसपार्कअगाडि रिङरोडमा ट्राफिक प्रहरीले यात्रुबहाक बसलाई रोकेर कारवाही गरेपछि चालकले त्यसको विरोध गदै सडकमै गाडी तेर्साएका छन् ।

आफ्नो गल्तीविना नै जरिवाना लिन खोजेको चालकको दाबी छ। त्यसपछि अरू बसका चालकहरूले पनि बस सडकमा तेर्साएर अवरोध गरे।

महानगरीय ट्राफिक प्रहरी महाशाखासँग बुझ्दा प्रहरी उपरीक्षक श्यामकृष्ण अधिकारीले यात्रुसँग बढी भाडा लिएको गुनासोपछि बसका चालकलाई पहिचान गरेर जरिवाना लिन खोज्दा अवरोध भएको बताए ।

उनीहरूले सडकमै बस तेर्साएर राखेपछि सोमबार बिहान १० बजेपछि करिब १५ मिनेट गोंगबुस्थित सडक अवरूद्ध भयो।

त्यसबेला रिङरोड भएर गुड्ने सवारी साधन चल्न सकेका थिएनन्। सडक अवरोध खुलाउन प्रहरी परिचालन गर्नु परेको थियो।

एसपी अधिकारीका अनुसार अहिले अवरोध हटिसकेको छ। ‘ट्राफिक प्रहरीले नियमानुसार कारवाही गर्न खोजेपछि चालकले अवरोध गरेका रहेछन्। अहिले अवरोध खुलिसक्यो,’ उनले भने।

ट्राफिक प्रहरी निरीक्षक शंकर श्रेष्ठका अनुसार बसका चालकले सामान ल्याएवापत पाँच सय रूपैयाँ लिएको गुनासो आएको थियो।

नेपालगञ्ज–काठमाडौं रूटको ना ५ ख २२८६ नम्बरको बसमा एक व्यक्तिले सामान पठाएका थिए। गत चैत २ मा सामान पठाउँदा उक्त बसका चालकले बढी पैसा लिएको गुनासो थियो।

‘बसका चालकलाई एक हजारदेखि पाँच हजारसम्म जरिवाना लाग्ने यातायातको दफाअनुसार कारवाही गरिएको हो,’ उनले भने, ‘त्यसपछि उनीहरूले चार/पाँचवटा गाडी सडकमा तेर्साएर राखेका हुन्।’

सामान ल्याएवापत बढी पैसा लिएको गुनासो आएपछि ट्राफिक प्रहरीले उक्त बस र चालकलाई खोजिरहेको थियो।

‘नेपालगञ्जबाट आज यो बस काठमाडौं आयो। किन बढी भाडा लिएको भन्दा आफूखुसी लिन नपाउने भनेपछि हामीले कारवाही गर्न खोज्दा उनीहरूले सडकमा गाडी तेर्साएका हुन्,’ उनले भने।


0 प्रतिक्रिया(हरु)


प्रतिक्रिया छोड्नुहोस्।

चिन्ता नलिनुहोस्! तपाईको इ-मेल ठेगाना प्रकाशित हुँदैन। आवश्यक क्षेत्रहरू चिह्नित छन्। (*).


Top