नेपाली   |  English

अमेरिकीमा नेपाली ड्राइभरमाथि हातपात गर्ने युवती प्रकाउ


A A A

गाडीबाट निस्कने बेलामा ती यात्रुहरूले खुर्सानीको धुलो छर्केका थिए।

एजेन्सी - अमेरिकाको सान फ्रान्सिस्कोमा नेपाली उबर ड्राइभरलाई हातपात गर्ने महिला पक्राउ परेकी छन्।

सान फ्रान्सिस्को प्रहरीका अनुसार नेपाली उबर ड्राइभर शुभाकर खड्कालाई गत आइतबार हातपात गर्ने २४ वर्षीया मलेसिया किंगलाई बिहीबार पक्राउ गरिएको हो।

घटनामा संलग्न अर्की महिलाको पनि खोजी भइरहेको छ। ती महिलाले आफू अधिकारीसामू उपस्थित हुने सन्देश वकिलमार्फत् पठाएकी छन्।

ललितपुरका खड्का आठ वर्षअघि अमेरिका गएका थिए। उनी सानफ्रान्सिस्को शहरमा गत आइतबार यात्रुको दुर्व्यवहारमा परेका थिए।

उनको गाडीमा चढ्न आएका तीन जना महिलामध्ये एकले मास्क लगाएकी थिइनन्।

मास्क नलगाएकी उनलाई खड्काले मास्क लगाउन भने। मास्क किन्न उनले एउटा ग्यास स्टेशनमा गाडी रोके।

उबरको मापदण्डअनुसार हरेक यात्रुले मास्क अनिवार्य लगाउनु पर्छ। त्यही भएर खड्काले मास्क लगाउन जोड दिएका थिए।

ती महिला यात्रुले भने मास्क लगाउन अस्वीकार गर्दै खड्कामाथि हातपात गरेकी थिइन्। उनले खड्काको फोनमा खोसेकी थिइन् भने मास्क पनि निकालिदिएकी थिइन्। ती महिलाले उनको अनुहारमा बेलाबेलामा खोकेको पनि भिडिओमा देखिन्छ।

यात्रुले यस्तो दुर्व्यवहार गरेपछि खड्काले उनीहरूलाई गाडीबाट निकालिदिएका थिए। गाडीबाट निस्कने बेलामा ती यात्रुहरूले खुर्सानीको धुलो छर्केका थिए।

पछि उबरले खड्कालाई गाडी सफा गर्न १२० अमेरिकी डलर दिएको थियो। उबर र अर्को राइड सेयरिङ कम्पनी लिफ्टले ती यात्रुहरूलाई आजीवन आफ्नो कम्पनीको सेवा प्रयोग गर्न प्रतिबन्ध लगाएका छन्।

एसियाली मूलका भएकाले खड्कामाथि हातपात भएको भन्दै अहिले यो घटनाले संसारभरि चर्चा पाइरहेको छ।

म अरू कोही मानिस भएको भए तिनीहरूले मलाई त्यस्तो व्यवहार गर्दैनथे। मैले उनीहरूसँग कुरा गर्न जब मुख खोलें। उनीहरूले मलाई आप्रवासी ठानेर डराउन सक्छौं भन्ने ठाने,’ एक अमेरिकी सञ्चारमाध्यमसँग खड्काले भनेका छन्,अर्को मानिससँग यस्तो व्यवहार गर्ने तिमीहरू जनावर हौ।

पछिल्लो समय अमेरिकामा एसियन र अन्य आप्रवासीमाथिको दुर्व्यवहार बढ्दै गएको छ। केही दिनअघि सानफ्रान्सिस्कोमै एक जना एसियाली मूलका ९१ वर्षका वृद्धलाई पनि दुर्व्यवहार भएको थियो।

गोफन्डमी डट ‌ओआरजी मार्फत् खड्काका लागि सहयोग उठाउन थालिएको छ। खड्का अहिले पनि तनाव डरमा रहेकाले उनी काममा फर्किन नसक्ने भएकाले सहयोग गर्न आग्रह गरिएको छ। उनका लागि २० हजार अमेरिकी डलर उठाउने अभियान चलेको थियो। शुक्रबार बिहानसम्म ६५ हजार डलरभन्दा बढी रकम उठिसकेको छ।


0 प्रतिक्रिया(हरु)


प्रतिक्रिया छोड्नुहोस्।

चिन्ता नलिनुहोस्! तपाईको इ-मेल ठेगाना प्रकाशित हुँदैन। आवश्यक क्षेत्रहरू चिह्नित छन्। (*).


Top